8 min read
2025-ci ildə Xaricdə Təhsil Trendləri: Hansı Ölkələr Daha Populyardır?
07.07.2025
Hər il minlərlə gənc daha yaxşı təhsil, fərqli perspektivlər və güclü karyera üçün xaricə üz tutur. Amma 2025-ci ildə vəziyyət bir qədər fərqlidir: rəqabət daha güclü, tələbələr daha seçici, ölkələr isə daha strateji yanaşırlar. Ən çox maraq görən ölkələri, təhsil trendlərini və ölkə seçimində diqqət etməli olduğunuz nüansları sizlər üçün seçdik.
Əvvəllər yalnız ABŞ və Böyük Britaniyada ingilis dilində təhsil almaq mümkündüsə, artıq Almaniya, Niderland, İsveç, İtaliya kimi ölkələrdə də bakalavr və magistr səviyyəsində yüzlərlə ingilisdilli proqram mövcuddur.
Bu, tələbələr üçün daha çox seçim imkanı yaradır və xərcləri daha optimal idarə etməyə şərait yaradır.
Öncədən yalnız təhsil keyfiyyəti vacib idisə, indi tələbələr “təhsildən sonra qala bilərəmmi?” sualına cavab axtarırlar. Məhz buna görə PSW (Post-Study Work) imkanları olan ölkələr ön plana çıxır.
Pandemiyadan sonra yüksəlişə keçən hibrid təhsil modeli, 2025-ci ildə də aktuallığını qoruyur. Xüsusilə işləyən tələbələr üçün bu model daha uyğun sayılır.
İqlim dəyişikliyi və texnoloji innovasiyalar 2025 təhsil trendinə birbaşa təsir edir. Tələbələr “yaşıl kampuslara” və “startap yönümlü Universitetlərə” üstünlük verirlər.
Xaricdə təhsil 2025 deyəndə ağla ilk gələn ölkələrdən biri Kanadadır. Kanada həm təhlükəsizlik baxımından, həm də immiqrasiya siyasətinə görə ən çox seçilən ölkədir. 3 illik magistr proqramlarından sonra 3 il iş icazəsi almaq mümkündür. Üstəlik, təqaüdlər və dövlət dəstəyi çox genişdir. Həmçinin, multikultural və müasir şəhər həyatı tələbələri cəlb edir.
Almaniya, xüsusilə mühəndislik və İT sahələrində, dünya reytinqində yüksək yerlərdə olan dövlət universitetləri ilə seçilir. Almanca bilməyə ehtiyac olmadan, tamamilə ingilis dilində magistr proqramları tapmaq mümkündür. Üstəlik, təqaüdlə tamamilə pulsuz təhsil almaq ehtimalınız çox yüksəkdir.
Niderlandda 2000-dən çox bakalavr və magistr proqramı ingilis dilində tədris olunur. Həm dizayn, psixologiya, biznes, həm də texnologiya üzrə keyfiyyətli proqramlara malikdir. Üstəlik, Avropada yaşamaq, səyahət etmək və PSW imkanı da buranı daha da cəlbedici edir.
Avstraliyada tələbələr həm yüksək keyfiyyətli təhsil alır, həm də kampusdan kənarda 20 saat həftəlik işləyə bilirlər. Təhsildən sonra 2-4 il arasında iş icazəsi təqdim olunur. Avstraliya universitetləri xüsusilə tibb, turizm və mühəndislik sahələrində öndədir. QS reytinqində yüksək pillələrdə olan Universitetləri, isti iqlimi və güclü tələbə dəstəyi ilə fərqlənir.
Fransa və İtaliya isə ənənəvi sahələrdən fərqli olaraq, yaradıcılıq, incəsənət və mədəniyyət yönümlü sahələr üzrə oxumaq istəyənlər üçün öz populyarlığını qoruyur. Təqaüd imkanları, Avropa İttifaqı içində sərbəst hərəkət və rəqabətli Universitetlər bu ölkələri daha da cəlbedici edir.
Xaricdə təhsil xərcləri hər zaman vacib meyardır. Tələbələr daha çox təqaüd verən və ya təhsil haqları aşağı olan ölkələrə yönəlirlər.
Təhsildən sonra ölkədə qalaraq işləmək şansı tələbələr üçün vacibdir. Kanada, Avstraliya və Almaniya bu baxımdan öndə gedir.
Sürətli viza prosesi və daha rahat immiqrasiya qaydaları, ölkə seçiminə böyük təsir göstərir.
Hər kəs üçün uyğun ölkə var, amma düzgün araşdırmaq şərtdir!
2025-ci ildə xaricdə təhsil almaq istəyənlər üçün Kanada, Almaniya, Niderland, Avstraliya, Fransa və İtaliya əsas seçimlər sırasındadır. Amma sizin üçün ən uyğun ölkəni seçmək, yalnız statistikaya deyil, həm də şəxsi prioritetlərinizə əsaslanmalıdır.
Doğru istiqamətdə doğru qərar vermək, sizə həm vaxt, həm də illərlə dəyər qazandıra bilər.
